Ingvald Forsberg

Ingvald Forsberg (fødd 5. januar 1886 i Nordfold, daud 4. oktober 1933 på Bodø sjukehus) var ein norsk journalist og forfattar.

Forsberg gjekk på i alt tre folkehøgskolar: Vågan 1910-11, Telemark 1911-12 og Voss 1912-13. Han arbeidde deretter på anlegg i Odda mens han skreiv den første boka si I anleggsbyen, roman fraa arbeidarlive, som i åra 1914-16 blei trykt som føljetong i Ungdomsbladet som kom ut i Kabelvåg. Boka var prega av inspirasjonen frå Kristofer Uppdals proletarromanar. Det kan sjå ut som boka blei samla og tilbode^[1], men dette er ikkje sikkert.^[2]

Etterkvart fekk Forsberg stillingar i pressa, først i Nordlendingen frå 1914, seinare i Østlandsposten og frå 1918 til 1919 i Fædrelandsvennen.

Den eigenlege debuten til Ingvald Forsberg kom i 1919 med ungdomsromanen Moglunten, om guten som blei kua av folkemeininga i bygda, men som viste oppfinnsemd i Lofotfisket og til sist vågar å fri til jenta der heime.^[3] Markus (1932) blir rekna som «den største og mest heilstøypte av bøkene hans», og hovudpersonen er ein framgangsmann i bygda som både lukkast som gårdbruker, blir godt gift og får ordførarvervet etter svigerfaren, men som likevel føler seg einsam og som ein tapar.^[3] «Det er ein sterk og heilstøypt psykologisk mannslagnad Forsberg gjev oss i denne boka.»^[3]

Olav A. Loen har skrive to minneskrift om han; eit blei gitt ut som særtrykk av avisa Austland på Hamar i 1943^[4], og eit blei gitt ut på Marius Evjebergs forlag i 1956.^[5]

• 1914-16: I anleggsbyen. Roman fraa arbeidarlive^[6]
• 1919: Moglunten, fortelling frå Nordland (nynorsk)^[7]
• 1921: Den store striden, roman om ung mann i religiøs krise, delvis sjølvbiografisk^[3] (nynorsk)^[8]
• 1925: Nyheim, framhald av Den store striden (nynorsk)^[9]
• 1932: Markus, roman (nynorsk)^[10]
• 1934: Det nye riket, roman om mann i livskriser (nynorsk)^[11]